A chamada de «Abanca» que se cortou cando empecei a falar en galego

A semana pasada sooume o móbil. Un número normal, un 6 dos de sempre. Ao outro lado, alguén que dicía chamar de Abanca.

Deixeino falar, por ver ata onde chegaba. En canto empecei a contestarlle en galego, colgou.

Despois chamei eu a ese número. Colleuno unha señora que non sabía de que lle falaba. Ninguén da súa casa me chamara: usaran o seu número para chamarme a min, e seguramente a moita máis xente.

Isto ten nome, spoofing: quen chama fai que na túa pantalla saia o número que queira, o do teu banco, o dun provedor ou o de calquera persoa. Aquela señora era tan vítima coma min.

Desde xuño de 2025 as operadoras teñen que bloquear as chamadas que chegan do estranxeiro cun número español. Axuda, pero non o para todo: a miña chegou igual.

E coa voz, peor

A min tocoume un descoñecido con présa por colgar. Nas empresas vemos algo máis elaborado. Primeiro chega un correo dun provedor de sempre, coa súa factura e un número de conta novo. Despois, ás veces, unha chamada cunha voz que parece a súa para confirmalo.

INCIBE recolleu en 2024 o caso dunha empresa que recibiu unha chamada coa voz do seu director, idéntica, pedindo unha compra e unha transferencia urxentes. Fixéronas. O director nunca chamara. Hoxe abondan uns segundos de audio dun vídeo ou dunha nota de voz para imitar a voz de calquera.

Se che chega unha chamada ou un correo así

1. Non deas códigos, contrasinais nin datos da tarxeta por teléfono. O teu banco non chos vai pedir.
2. Colga e chama ti ao número oficial, o da tarxeta ou o da web, nunca ao que che dean.
3. Se un provedor che pide pagar noutra conta, non pagues ata confirmalo chamando ti ao número de sempre.
4. Se xa pagaches, chama ao teu banco agora mesmo: ás veces pódese deter a transferencia.
5. Garda o correo tal como chegou e denúncialo na Policía ou na Garda Civil.
6. Chámanos e miramos se o engano saíu dunha conta roubada, túa ou do provedor.

Na empresa, dous costumes que pechan moitos ocos

Que calquera cambio de conta dun provedor o aprobe unha segunda persoa, que non sexa quen recibiu a petición. E pedir o certificado de titularidade que emite o seu banco antes de dar o cambio por bo.

No correo, dobre factor en todas as contas e o dominio ben configurado, para que ninguén poida escribir facéndose pasar pola túa empresa.